မွေးမြူသူများ အကျိုးရှိနိုင်တဲ့ ကုန်သွယ်မှုစနစ် ရေရှည်တည်တံ့နိုင်ရေးအတွက် ပွင့်လင်းမြင်သာစွာ ဆွေးနွေး အကြံပြုကြစေလိုကြောင်း အမြဲတမ်းအတွင်းဝန် ပြောကြား
မွေးမြူရေးလုပ်ငန်းကို အဓိကလုပ်ကိုင် အသက်မွေးဝမ်းကျောင်းပြုနေသူတို့အတွက် ရေရှည်အကျိုးရှိစေနိုင်တဲ့ ကုန်သွယ်မှုစနစ်တွေ တည်တံ့နိုင်ရေးအတွက် ကဏ္ဍအသီးသီးက တာဝန်ရှိသူတွေအနေနဲ့ ပွင့်လင်းမြင်သာစွာ ဆွေးနွေး အကြံပြုကြစေလိုကြောင်း အမြဲတမ်းအတွင်းဝန် ဒေါက်တာခင်ဇော်က ပြောပါတယ်။
မတ်လ ၁၆ ရက်က မင်္ဂလာသီရိဟိုတယ်မှာ ကျင်းပတဲ့ ကျွဲ၊ နွားမွေးမြူရေး ဖွံ့ဖြိုးတိုးတက်မှုနှင့် ပြည်ပသို့ တရားဝင်တင်ပို့ခြင်းဆိုင်ရာ အစည်းအဝေးမှာ မွေးမြူသူတွေအတွက် အကျိုးရှိစေနိုင်တဲ့ ကုန်သွယ်မှုစနစ်တွေ ပြည်ပဝင်ငွေတိုးစေရေးနဲ့ အလုပ်အကိုင် အခွင့်အလမ်းတွေ တိုးပွားလာစေရေးအတွက် အကြံပြု ဆွေးနွေးစေလိုတယ်လို့ အမြဲတမ်းအတွင်းဝန်က ပြောကြားခဲ့တာပါ။
စိုက်ပျိုးရေး၊ မွေးမြူရေးနှင့်ဆည်မြောင်းဝန်ကြီးဌာန၊ အမြဲတမ်းအတွင်းဝန် ဒေါက်တာခင်ဇော်က “ကျွဲ၊ နွား မွေးမြူရေး ဖွံ့ဖြိုးတိုးတက်မှုနှင့် ပြည်ပသို့ တရားဝင်တင်ပို့ခြင်းဆိုင်ရာတို့နဲ့ပတ်သက်ပြီး ဝန်ကြီးဌာနရဲ့ မျှော်မှန်းချက်နဲ့အညီ မွေးမြူထုတ်လုပ်မှု လုပ်ငန်းတွေ ဖွံဖြိုးတိုးတက်လာစေရန်၊ နိုင်ငံမှာရှိတဲ့ အရင်းအမြစ်တွေကို မထိခိုက်ပဲ တိရစ္ဆာန်နဲ့ တိရစ္ဆာန်ထွက်ပစ္စည်းတွေကို ပြည်ပကို တရားဝင် တင်ပို့နိုင်စေရေး အတွက် မွေးမြူရေးနှင့်ကုသရေးဦးစီးဌာနကို ဦးဆောင်ပံ့ပိုးမှုတွေ ပေးလျက်ရှိပါတယ်။ ပြည်ပကို တင်ပို့မှုကြောင့် ပြည်တွင်းစားသုံးမှု မထိခိုက်ရေး၊ အရင်းအမြစ်တွေ မကုန်ခမ်းစေရေး၊ နွား မျိုးကောင်းမျိုးသန့်တွေ မွေးမြူစေရေး၊ မျိုးထိန်းမျိုးမြင့်စေရေး ကဏ္ဍများစွာကို စီမံချက်ချ ဆောင်ရွက်လျက် ရှိပါတယ်” လို့ ပြောပါတယ်။
ကျွဲ၊ နွားတွေကို ပြည်ပသို့ တင်ပို့ဆောင်ရွက်ခဲ့တဲ့ လုပ်ငန်းကိစ္စတွေကို ပြန်လည်သုံးသပ်ရန်၊ ရှေ့လုပ်ငန်းစဉ်တွေ ချမှတ်ရန်နဲ့ မွေးမြူရေးလုပ်ငန်း လုပ်ကိုင်သူတွေအတွက် ရေရှည်အကျိုးရှိစေနိုင်တဲ့ ကုန်သွယ်မှုစနစ် တည်တံ့စေရန်အတွက် ကဏ္ဍများစွာကို စီမံချက်ချ ဆောင်ရွက်လျက်ပြီး အခုအစည်းအဝေးဟာ တတိယအကြိမ်မြောက် ကျင်းပတာဖြစ်တယ်လို့ သိရပါတယ်။
နန်းထက်ထက်ချစ်
Myanmar Business Directory-Upper/Lower