မြိတ်မြို့ရှိ ငါးသေတ္တာစက်ရုံ လုပ်ငန်းစတင်လည်ပတ်
မြိတ်မြို့မှာရှိတဲ့ ဒေသခံရေလုပ်သားတွေထံမှ ကုန်ကြမ်းတွေကို ဝယ်ယူပြီး သွင်းကုန်အစားထိုး ငါးသေတ္တာစက်ရုံတစ်ခု စတင်လည်ပတ်နေပြီဖြစ်တာကြောင့် မကြာမီ ပြည်ပဈေးကွက်ကို ပြန်လည်ပို့ဆောင်နိုင်ဖို့ စီစဉ်ဆောင်ရွက်သွားမှာဖြစ်တယ်လို့ သိရပါတယ်။
မြိတ်မြို့၊ ကျောက်ဖျာမြို့သစ် စီမံကိန်းဧရိယာမှာ လည်ပတ်နေပြီဖြစ်တဲ့ အဆိုပါ ငါးသေတ္တာစက်ရုံကြီးမှာ လက်ရှိ ကုန်ချောတွေကို ထုတ်လုပ်နေပြီး ရန်ကုန်မြို့ကို ပို့ဆောင်ကာ ပြည်တွင်းဈေးကွက်အတွင်း ဖြန့်ချီနေပြီဖြစ်တယ်လို့ သိရပါတယ်။
အဆိုပါ စက်ရုံကြောင့် ဒေသခံတွေကိုလည်း အလုပ်အကိုင်အခွင့်အလမ်းတွေ ဖန်တီးပေးနိုင်ပြီး ပင်လယ်အတွင်းမှ ရေလုပ်သားတွေထံမှလည်း ကုန်ကြမ်းတွေ ပြန်လည်ဝယ်ယူနေကာ လက်ရှိမှာ တစ်လကို ကုန်ချိန် ကီလိုတစ်သိန်း တင်ပို့ပေးနေရတယ်လို့ သိရပါတယ်။
“Myanmar Marko Industry Co., Ltd ကို ၁၉၉၇ ခုနှစ်ကတည်းက စတင်ပြီး ရန်ကုန်မှာ လုပ်ခဲ့ပါတယ်။ Ready Brand နဲ့ အသားမျိုးစုံ ထုတ်လုပ်ပါတယ်။ Customer တွေရဲ့ လိုအပ်ချက်ကို ဖြည့်ဆည်းပေးပြီး ထုတ်ပေးရပါတယ်။ မြိတ်စက်ရုံက ထွက်တာတွေကို ရန်ကုန်ရုံးချုပ်ကို ပို့ပြီးတော့ ရန်ကုန်ကနေ မြန်မာတစ်နိုင်ငံလုံးကို ဖြန့်ဖြူးပေးနေပါတယ်။ ကျွန်တော်တို့အနေနဲ့ ရေရှည်မှာ Export လုပ်ဖို့အထိ ရည်မှန်းထားပါတယ်။ လာမယ့်နှစ်တွေမှာ ပြည်ပပို့နိုင်ဖို့ လုပ်ဆောင်နေပါတယ်။ ပျမ်းမျှကတော့ ကုန်ချိန်တစ်သိန်းလောက် လစဉ်တင်ပို့ပေးနေရပါတယ်။ ဒီလို ရာသီဥတုဆိုးရွားတဲ့ အချိန်တွေမှာတော့ ပုံမှန်တွက်ထားလို့ မရပါဘူး။ ငါးရရှိမှုအပေါ်မူတည်ပြီး စက်ရုံအသစ်ကြီးမှာ တစ်လကို ကွန်တိန်နာ ၃ လိုင်း kg ၃ သိန်းလောက်ကို ထပ်တိုးချဲ့ပြီး ထုတ်လုပ်ဖို့ လျာထားပါတယ်" လို့ Myanmar Marko Industry Co., Ltd မှ ဒုမန်နေဂျာ ဦးစိုးမိုးကျော်က ပြောပါတယ်။
ဒေသခံ ငါးလုပ်သားတွေထံမှ ပလာတူး၊ ပလာဝမ်း၊ ဘောင်းကျေး၊ ငါးချဉ်ပေါင် (ဒေသအခေါ်အဝေါ်များ) စတဲ့ ငါးတွေကို ဝယ်ယူကာ ငါးသေတ္တာ ပြန်လည်ပြုလုပ်နေတာဖြစ်တယ်လို့ ပြောပါတယ်။
“ကျွန်တော်တို့ စက်ရုံကနေ ရန်ကုန်စက်ရုံကို ပို့တဲ့အခါ လမ်းခရီးမှာ နိုင်ငံခြားက သွင်းကုန်တွေနဲ့ တချို့ ရောထွေးကုန်တာတွေ ရှိတယ်။ တချို့ဌာနဆိုင်ရာတွေနဲ့ တချို့မြို့တွေက မြိတ်မြို့မှာ ခုလိုငါးသေတ္တာစက်ရုံရှိတာကို မသိကြဘူး။ ဒါက အဓိကကျပါတယ်။ ဒီလိုနယ်မှာ သွင်းကုန်အစားထိုး စက်ရုံကြီးတစ်ခု ရပ်တည်နေတယ်ဆိုတာ ကျယ်ကျယ်ပြန့်ပြန့် သိစေချင်ပါတယ်" လို့ ဦးစိုးမိုးကျော်က ပြောပါတယ်။
သွင်းကုန်အစားထိုး ကုန်စည်အဖြစ် လည်ပတ်နေပေမယ့်လည်း ထိုင်းနိုင်ငံက တင်သွင်းလာတဲ့ ငါးသေတ္တာတွေနဲ့ မှားယွင်းကာ တားဆီးခံရမှုတွေရှိနေတာကြောင့် အခက်အခဲတွေ ရှိတယ်လို့လည်း ပြောပါတယ်။
အဆိုပါ ငါးသေတ္တာစက်ရုံကြီးက တနင်္သာရီတိုင်းဒေသကြီးအတွင်း တစ်ခုတည်းသာရှိပြီး ပြည်ပဈေးကွက်ကို ပြန်လည်ထိုးဖောက်ကာ တင်ပို့ရန် စီစဉ်နေပြီး လာမယ့် ဒီဇင်ဘာလမှာ စက်ရုံဖွင့်လှစ်မှု ဆောင်ရွက်မှာ ဖြစ်တယ်လို့ သိရပါတယ်။
Source & Photo: Eleven