ပန်းဆိုးတန်း- ဒလ ဆိပ်ကမ်းတွင် ခရီးသွားများ များပြားလာ၍ ခရီးစဉ်များ တိုးချဲ့

Friday, 06 November 2020 10:25

ရန်ကုန်(ပန်းဆိုးတန်း/ဒလ) ကူးတို့ ဆိပ်ကမ်းသည် အနယ်နယ် အရပ်ရပ်မှ ခရီးသွားများ၊ အစိုးရဝန်ထမ်းများ၊ ပုဂ္ဂလိကဝန်ထမ်းနှင့် လုပ်သားပြည်သူများစွာ တို့ကို  ရန်ကုန်မြို့သို့  နေ့စဉ်ကူးတို့ပို့ဆောင်ပေးလျက်ရှိသော ဆိပ်ကမ်းတစ်ခု ဖြစ်ပြီး ကိုဗစ်ဖြစ်ပွားနေသည့် ကာလအတွင်းတွင် ခရီးသွားများ ပြန်လည်များပြားလာသည့်အတွက် ခရီးစဥ်တိုးချဲ့မှုများကို ပြန်လည် ပြုလုပ်ခဲ့သည်။

ရန်ကုန်မြို့၊ ပန်းဆိုးတန်း- ဒလ ဆိပ်ကမ်း၌ Covid-19 ရောဂါ ကာကွယ် ထိန်းချုပ်ရေးအတွက်  ဧပြီလမှ စတင်ပြီး ခေါက်ရေလျှော့ချ ပြေးဆွဲမှုများ ပြုလုပ်ခဲ့ခြင်း ဖြစ်သည်။ 

နေအိမ်တွင်နေထိုင်ရေး (Stay at Home) ကြေညာထားသည့်အချိန် ကာလအတွင်းမှ စတင်ကာ သင်္ဘောခရီးစဉ်များကို အသွား (၁၆) ခေါက်၊ အပြန် (၁၆) ခေါက် နှုန်းဖြင့် ပြေးဆွဲခဲ့ရာမှ  လက်ရှိအချိန်တွင် လုပ်ငန်းခွင်များသို့  သွားရောက်ကြသည့် ခရီးသည်များ များပြားလာသည့်အတွက် သင်္ဘောခရီးစဉ်များကို ပြန်လည်တိုးချဲ့ ဆောင်ရွက်နေခြင်း ဖြစ်သည်။

ထိုသို့ ပြန်လည်ပြေးဆွဲမှုများကို  နိုဝင်ဘာ (၅) ရက်နေ့မှ ပြန်လည် တိုးချဲ့ ပြေးဆွဲပေးလျက်ရှိကြောင်း ပြည်တွင်းရေကြောင်းပို့ဆောင်ရေး မြစ်ဝကျွန်းပေါ်ဌာနခွဲမှ ပြောကြားချက်အရ သိရှိရသည်။

သီတင်းကျွတ်ပိတ်ရက် မတိုင်မီ အောက်တိုဘာ (၂၆) ရက်နေ့မှ စတင်ကာ  ယနေ့အချိန်ထိ တဖြည်းဖြည်း ခရီးသွားလာမှု များလာသည့်အတွက် အသွားအလာများ အဆင်ပြေစေရန် သင်္ဘောခရီးစဉ် ခေါက်ရေတိုး၍ ပြေးဆွဲရခြင်းဖြစ်သည်။

Covid-19 ရောဂါ ကာကွယ်ထိန်းချုပ်ရေး ကာလအတွင်းတွင်  နေ့စဉ် ခရီးသည် အသွား ၊ အပြန် (၁၄၀၀)ခန့်သာရှိခဲ့ပြီး အောက်တိုဘာလ (၂၆) ရက်နေ့မှစတင်ကာ နေ့စဉ် ခရီးသည် (၆၀၀၀) ခန့် သွားလာလျက်ရှိနေသည် ဖြစ်သည်။

ပန်းဆိုးတန်း-ဒလ ဆိပ်ကမ်း၌ Covid-19 ကူးစက်ရောဂါ မဖြစ်ပွားခင် ကာလများ၌ ယခင်ပုံမှန်ပြေးဆွဲနေသည့် ခရီးစဉ်မှာ အသွား(၄၆)ခေါက်၊ အပြန်(၄၆)ခေါက်နှုန်းဖြင့် ပြေးဆွဲခဲ့ကာ ခရီးသည် (၃၀၀၀၀) ခန့်အား ပို့ဆောင်ပေးခဲ့ရခြင်း ဖြစ်သည်။

By-Aye Myat

Source:moi,mrtv

ဆယ်စုနှစ်အတွင်း တရုတ်မှ ကုန်စည်တန်ဖိုး (၂၂) ထရီလီယံအား ကမ္ဘာအနှံ့သို့ တင်ပို့မည်

Friday, 06 November 2020 08:27

တရုတ်နိုင်ငံသည် လာမည့် ဆယ်စုနှစ်အတွင်းတွင် အမေရိကန်ဒေါ်လာ (၂၂) ထရီလီယံ ခန့် ရှိသော  ကုန်စည်များအား  နိုင်ငံတကာသို့ တင်ပို့သွားမည် ဖြစ်ကြောင်း တရုတ်သမ္မတမှ  နိုဝင်ဘာ(၄)ရက်နေ့တွင် ထုတ်ပြန်ပြောကြားထားသည်။ 

လက်ရှိအချိန်တွင် တစ်ကမ္ဘာလုံးဆိုင်ရာ ကိုရိုနာဗိုင်းရပ်စ် ကူးစက်ရောဂါ ဖြစ်ပွားနေသော်လည်း  ဈေးကွက်စီးပွားရေးကို အရှိန်မြှင့် လုပ်ဆောင်သွားမည် ဖြစ်ကြောင်း  ရှန်ဟိုင်းတွင်   နိုဝင်ဘာ (၅) ရက်မှ (၁၀) ရက်ထိ ကျင်းပမည့်  တရုတ်နိုင်ငံတကာ သွင်းကုန်ကုန်စည်ပြပွဲ ဖွင့်ပွဲတွင် ကြောညာချက် ထုတ်ပြန်ထားခြင်း ဖြစ်သည်။ 

တရုတ်သည် လာမည့်(၁၅)နှစ်အတွင်းတွင် ကုန်စည်များကို အမေရိကန်ဒေါ်လာ ထီရီလီယံ(၃၀)ခန့်နှင့် အမေရိကန်ဒေါ်လာ (၁၀) ထီရီလီယံအား တင်ပို့နိုင်ရန်  မျှော်လင့်ထားရှိသည်ဟု (၂၀၁၈)ခုနှစ်တွင် တရုတ်သမ္မတမှ ပြောခဲ့ဖူးသည်ဟု သတင်းထုတ်ပြန်ချက်များအရ သိရှိရသည်။

တရုတ်စီးပွားရေး လုပ်ငန်းစု အသိုင်းအဝိုင်း၏ ပြောကြားချက်အရ အဆိုပါ ကုန်စည်ပြပွဲသည် တရုတ်မှ စီးပွားရေးလုပ်ငန်း အများစုအတွက်  လမ်းဖွင့်ပေးမည့် အချက်ပြမှု ဖြစ်ကြောင်း ပြောကြားထားသည်။ Covid-19 ကူးစက်ရောဂါ ဖြစ်ပွားမှုများ ရှိနေသော်လည်း အဆိုပါ ပြပွဲအား နိုင်ငံခြားမှ စီးပွားရေး သမားများသာမက  နိုင်ငံရေး ခေါင်းဆောင် အများစုမှလည်း ယင်းပွဲအား လူကိုယ်တိုင်တက်ရောက်ရန် မျှော်လင့်ထားကြသည်။

အဆိုပါဖွင့်ပွဲနေ့ အခမ်းအနားတွင်  ရုပ်သံမိန့်ခွန်းအား ပြောကြားမည့်သူများတွင် ဆားဘီးယား သမ္မတနှင့်  ကမ္ဘာ့ကျန်းမာရေးအဖွဲ့ (WHO)မှ   ညွှန်ချုပ်များလည်း  ပါဝင်မည် ဖြစ်သည်။

By-Aye Myat

Source:dvb

မြန်မာ-ကိုရီးယား ချစ်ကြည်ရေး (ဒလ) မြစ်ကူးတံတား တည်ဆောက်ရေး လုပ်ငန်းများ ပြန်လည်စတင်

Friday, 06 November 2020 04:55

ရန်ကုန်မြို့ လမ်းမတော်မြို့နယ်ရှိ ဘုန်းကြီးလမ်းနှင့် ဒလမြို့နယ် ကမာကဆစ်ရပ်ကွက်ရှိ ဗိုလ်မင်းရောင် လမ်းမကြီးတို့သို့ ဆက်သွယ်ထားသော  မြန်မာ-ကိုရီးယား ချစ်ကြည်ရေး (ဒလ)မြစ်ကူးတံတား တည်ဆောက်ရေး လုပ်ငန်းများကို Covid-19 ဖြစ်ပွားစဥ် ကာလအတွင်းတွင်  တစ်လနီးပါးခန့် ယာယီရပ်နားထားခဲ့ရာမှ ယခုအခါတွင် တည်ဆောက်ရေး လုပ်ငန်းများ ပြန်လည်လုပ်ဆောင်နေပြီ ဖြစ်သည်။ 

စက်တင်ဘာ (၂၁)ရက်နေ့မှ အောက်တိုဘာ (၂၅) ရက်နေ့အထိ တံတား တည်ဆောက်ရေးလုပ်ငန်းများကို ယာယီရပ်နားခဲ့ခြင်း ဖြစ်သည်။ ယင်းတည်ဆောက်ရေး လုပ်ငန်းများ ဆောင်ရွက်ရာတွင်   ချဉ်းကပ်တံတားများနှင့်  ဘိုးပိုင်တူးဖော်ခြင်း လုပ်ငန်းများကို အောက်တိုဘာ (၂၆) ရက်တွင် ပြန်လည်စတင်ခဲ့သည်။ ပင်မတံတား ရေလယ်တိုင် ဘိုးပိုင်တူးဖော်ခြင်းလုပ်ငန်းများကို နို၀င်ဘာ (၄) ရက်နေ့တွင် ပြန်လည်စတင် ဆောင်ရွက်နေသည် ဖြစ်သည်။

အဆိုပါ တည်ဆောက်ရေးလုပ်ငန်းများ ဆောင်ရွက်ရာတွင် Covid-19 ရောဂါ ကာကွယ်၊ ထိန်းချုပ်၊ ကုသရေးကော်မတီ၏ လုပ်ငန်းညွှန်ကြားချက်များနှင့်အညီ ဆောင်ရွက်သွားမည်ဖြစ်ကြောင်း ဆောက်လုပ်ရေးဝန်ကြီးဌာန တံတားဦးစီးဌာနမှ တာဝန်ရှိသူတစ်ဦးထံမှ သိရသည်။

ဒလမြစ်ကူးတံတားမှာ စုစုပေါင်းအရှည် (၆၁၂၈) ပေ ရှိပြီး  ပင်မတံတားအရှည်မှာ  (၂၂၆၄) ပေရှိသည်။ ရေလမ်းကင်းလွတ်အမြင့်ပေမှာ  (၁၆၀) ပေ ရှိသည့်အပြင် ရေလမ်းကင်းလွတ် အကျယ်ပေမှာ (၉၈၈) ပေ ရှိသည်။တံတားခံနိုင်ဝန်မှာ ယာဉ်တစ်စီးချင်း (၇၅)တန် ခန့် ဖြစ်ပြီး သံကူကွန်ကရစ် ကိုယ်ထည်အပေါ်တွင် သံမဏိ ကြိုးဆိုင်းတံတား အမျိုးအစားဖြစ်သည်။

အဆိုပါ တံတားကြီး တည်ဆောက်ပြီးစီးပါက ရန်ကုန်တောင်ပိုင်း ခရိုင်အတွင်းရှိ ဒလ၊ ဆိပ်ကြီးခနောင်တို၊  တွံတေး၊ ကော့မှူး၊ ကွမ်းခြံကုန်းမြို့နယ်များရှိ ဒေသခံပြည်သူများအပြင် ဧရာဝတီတိုင်း ဒေသကြီးအတွင်းရှိ ဒေသခံပြည်သူများပါ ရန်ကုန်မြို့သို့ အချိန်တိုအတွင်း ဆက်သွယ်သွားလာနိုင်မည် ဖြစ်သည့်အပြင်  လမ်းပန်းဆက်သွယ်ရေး လွယ်ကူချောမွေ့ကာ ကုန်စည်စီးဆင်းမှုများ ပိုမိုမြန်ဆန်လာပြီး ဒေသခံ ပြည်သူတို့၏ လူမှုစီးပွားဘဝများ ဖွံ့ဖြိုးတိုးတက်လာမည်ဖြစ်သည်။

 By-mdn,mrtv


မန္တလေးတိုင်းတွင် ကိုဗစ်ကာလအတွင်း ပျားရည်ဈေးကောင်းရရှိ

Thursday, 05 November 2020 11:33

မန္တလေးတိုင်းဒေသကြီး၊ ညောင်ဦးခရိုင် ကျောက်ပန်းတောင်းမြိုနယ်အတွင်းရှိ ငါ့သရောက်မြို့အတွင်းရ ပျားရှာဖွေသူ အများစုသည် ယခု ကိုဗစ်ကာလ အတွင်းတွင်  ပျားရည်ဈေးကောင်း ရရှိနေသည့်အတွက်  မိသားစုဝင်ငွေ တွက်ခြေကိုက်နေသည် ဖြစ်ကြောင်း  ပျားရည်ရောင်းချနေသူများ၏ ပြောကြားချက်အရ သိရသည်။

ညောင်ဦးခရိုင် ကျောက်ပန်းတောင်းမြို့နယ်ရှိ  ဂွေကုန်း၊ လက်ပံအိုင့်၊ ရွာသစ်၊ ကန်ပေါက်၊ ခွေးတောက်ပင်၊ တောင်နောက်ကျေးရွာနှင့် ညောင်ဦးမြို့နယ်ရှိ  သူကောင်းတည်၊ အထက်ညဉ့်၊ အောက်ညဉ့်၊ ပုလင်းအနောက်၊ ပုလင်းအရှေ့၊ တောင်ဖက်တန်းကျေးရွာတို့နှင့် ငါ့သရောက်မြို့ အောင်သာ၊ ကန်သာယာ၊ ဆင်သားမွေကျေးရွာတို့သည် တစ်နှစ်ပတ်လုံး  ပျားရည် ရောင်းချခြင်းများဖြင့် မိသားစုစားဝတ်နေရေး ပြေလည်နေသည် ဖြစ်‌ကြောင်း ပျားရှာဖွေ လုပ်ကိုင်နေသူ တစ်ဦးမှ ပြောကြားသည်။

ပျားရှာဖွေသူ အများစုသည်  ပျားနားဋောင်း၊ ပျားကြီးအုံ၊ ပစ်သုန်းပျား၊ ပရင်း(ယင်း)ပျားအုံများရှာဖွေကာ ရောင်းချလေ့ရှိသည်။ ပျားနားဋောင်းအုံသည် အငယ်စားပျားအုံ အမျိုးအစားဖြစ်ပြီး ပစ်သုန်းပျားသည် အခေါင်းရှိသော သစ်ပင်များတွင် အသိုက်အအုံဖွဲ့နေကြလေ့ရှိသည်။ ပရင်း(ယင်း) ပျားသည် သစ်ပင်အခေါင်းကျယ်နှင့် မြေတွင်းကျယ်များအတွင်း အုံဖွဲ့နေကြသည်။ ပျားနားဋောင်းအုံသည် ပျားရည် အနည်းငယ်သာပါရှိပြီး ပျားကြီးအုံတစ်အုံရရှိပါက ပျားရည် (၂၅) ကျပ်သားမှ (၅၀) ကျပ်သား အထိ ရရှိလေ့ရှိကြသည်။

ပရင်း(ယင်း)ပျားအုံကို ရရှိပါက ပျားသလက်အနည်းဆုံး ငါးချပ်မှ ပျားသလက် (၁၅) ချပ်ထိပါရှိကြလေ့ ရှိသည်။ ယင်းသည် အထပ်လိုက် အုံဖွဲ့နေသည့်  ပျားမျိုး ဖြစ်သည့်အတွက် ပျားရည်အလွန် ကြည်လင်လေ့ရှိသည်။ ထို့အပြင် ၄င်းပျားရည်သည် တစ်ပိဿာမှ ငါးပိဿာထိ ပါရှိတတ်ကြောင်း ကျောက်ပန်း တောင်းမြို့နယ် ဂွေကုန်းကျေးရွာ ပျားရှာဖွေသူ တစ်ဦးမှ ပြောကြားသည်။

လက်ရှိအချိန်တွင် ပျားရည်တစ်ပိဿာလျှင် (၇၀၀၀) ကျပ်မှ (၈၀၀၀) ကျပ် အထိ ရောင်းချနေရသည် ဖြစ်သည်။ ပျားရည်  ရောင်းချသူများအနေဖြင့် တစ်ရက်လျှင် ပျားရှာဖွေသူများ တစ်ပိဿာမှ လေးပိဿာထိ ရှာဖွေရောင်း ချ နေရသည့်အတွက်  မိသားစုစီးပွားရေး ဝင်ငွေကောင်း နေသည် ဖြစ်သည်။

By-Aye Myat

Source:mdn.gov

ဂျပန်ယန်း (၄၂,၇၇၉) ဘီလီယံ တန်ဖိုးရှိ စီမံကိန်း(၂)ခုအား မကြာခင်လုပ်ဆောင်မည်

Thursday, 05 November 2020 10:38

ဆောက်လုပ်ရေးဝန်ကြီးဌာန၊ တံတားဦးစီးဌာနမှ  ဆောင်ရွက်မည့် အရှေ့-အနောက် စီးပွားရေး စင်္ကြံလမ်းမကြီးပေါ်တွင် ရှိသည့် ပဲခူး-ကျိုက်ထို လမ်းသစ်ပိုင်း ဖွံ့ဖြိုးတိုးတက်ရေး စီမံကိန်းနှင့် အသေးစား အလတ်စား စီးပွားရေးလုပ်ငန်းများ ဖွံ့ဖြိုးတိုးတက်မှု စီမံကိန်းအတွက်  လဲလှယ်မှုစာချွန်လွှာများ မြန်မာနှင့် (JICA) တို့မှ တာဝန်ရှိပုဂ္ဂိုလ်များက လက်မှတ်ရေးထိုးခဲ့ကြသည်။

အဆိုပါ စီမံကိန်း နှစ်ခုပေါင်းသည် ဂျပန်ယန်း (၄၂,၇၇၉) ဘီလီယံ (အမေရိကန် ဒေါ်လာ ၄၀၉ သန်းခန့်)ရှိသည်။ပထမစီမံကိန်းတွင် အရှေ့-အနောက်စီးပွားရေး စင်္ကြံတွင်ပါဝင်ပြီး မကြာမီ ပဲခူး-ကျိုက်ထို လမ်းပိုင်း အသစ်တည်ဆောက်မည့်  မြို့ရှောင်လမ်းပေါ်တွင် တံတားအသစ် တစ်စင်းကို တည်ဆောက်မည် ဖြစ်ပြီး  သုဝဏ္ဏရှိ ဗဟိုသင်တန်းကျောင်း ကိုလည်း  ပြန်လည်ပြုပြင်သွားမည် ဖြစ်ကြောင်း မြန်မာနိုင်ငံဆိုင်ရာ ဂျပန်သံရုံးက ထုတ်ပြန်ထားသည်

ဒုတိယ စီမံကိန်းတွင် အသေးစားနှင့် အလတ်စား စီးပွားရေး လုပ်ငန်းများ ဖွံ့ဖြိုးတိုးတက်မှုစီမံကိန်းအား  ဆောင်ရွက်ခြင်းဖြင့် ကမ္ဘာတစ်ဝန်း ဖြစ်ပေါ်လျက်ရှိသည့် COVID–19 ကူးစက်ရောဂါကြောင့် ထိခိုက်မှုရှိခဲ့သည့်  MSMEs လုပ်ငန်းများ ပြန်လည်လည်ပတ်စေရန်အတွက် အတိုးနှုန်းသက်သာမည့် ချေးငွေများဖြင့် ပံ့ပိုးကူညီပေး နိုင်မည်ဖြစ်သည်။

အရှေ့-အနောက် စီးပွား‌ရေးစင်္ကြံ အမြန်လမ်း ဖွံ့ဖြိုးတိုးတက်ရေး စီမံကိန်း (ပဲခူး-ကျိုက်ထိုလမ်းပိုင်း) အတွက် ဂျပန်နိုင်ငံမှ  ဂျပန်ယန်း ၂၇,၇၇၉ သန်း (အမေရိကန် ဒေါ် လာ ၂၆၅ သန်းခန့်) ထောက်ပံ့ထားရှိသည်။ယင်း စီးပွားရေးစင်္ကြံသည် ဗီယက်နမ်၊ ထိုင်း၊ လာအိုနှင့် မြန်မာနိုင်ငံတို့ကို ဖြတ်သန်းသွားနေသည့် လမ်းကြောင်းဖြစ်ပြီး ထိုင်းနှင့် မြန်မာကို  ဆက်သွယ်ပေးသည့် အဓိကလမ်းမကြီး တစ်ခုလည်း ဖြစ်သည်။

အဆိုပါစီမံကိန်း ပြီးစီးပါက ဒေသခံပြည်သူများ၏ လမ်းပန်းဆက်သွယ်ရေး လုံခြုံချောမွေ့စေပြီး ကူးသန်းရောင်းဝယ်ရေး လုပ်ငန်းများအတွက် အကျိုးဖြစ်ထွန်းစေသည့်အပြင် ပြည်တွင်းပြည်ပ ကုန်သွယ်မှုများ ပိုမိုတိုးတက်လာစေမည် ဖြစ်သည်။

ထို့အပြင် ရန်ကုန်-ပဲခူး-မြဝတီလမ်း၏ အတိုဆုံး လမ်းကြောင်းဖြစ်သဖြင့် အရှေ့-အနောက် စီးပွားရေးစင်္ကြံလမ်းမကြီးနှင့် ပဲခူးတိုင်း ဒေသကြီးတွင် ဖြစ်ပေါ်နိုင်သည့်  ယာဉ်ကြောပိတ်ဆို့မှုများနှင့် ကုန်စည်စီးဆင်းမှု နှောင့်နှေးခြင်းတို့ကို ဖြေရှင်း ပေးနိုင်မည် ဖြစ်သည်။

COVID-19 ကြောင့် ဖြစ်ပေါ်သည့် စီးပွားရေး သက်ရောက်မှုများကို လျှော့ချရန်နှင့် နိုင်ငံ၏ စက်မှုနှင့် စီးပွားရေးကဏ္ဍ ပြည့်စုံမှန်ကန်စွာ ဖွံ့ဖြိုးတိုးတက်‌ရန်နှင့် အလုပ်အကိုင် အခွင့်အလမ်း အသစ်များပေါ် ပေါက်စေရန်အတွက် ပံ့ပိုးကူညီကြောင်းလည်း အဆိုပါ ထုတ်ပြန်ချက်တွင် ဖော်ပြထားသည်။  

By-Aye Myat

Ref:mdn,mizzima

ရွေးကောက်ပွဲနေ့မှာ COVID-19 ကို ကာကွယ်ရင်း စိတ်ချလုံခြုစွာ မဲဘယ်လိုပေးကြမလဲ

Thursday, 05 November 2020 07:26

၂၀၂၀ အထွေထွေရွေးကောက်ပွဲကြီးကို မကြာခင် ကျင်းပတော့မှာ ဖြစ်ပါတယ်။ ကိုဗစ်ကာလတွင်း ကျင်းပတဲ့  ရွေးကောက်ပွဲ ဖြစ်တာကြောင့် အိမ်အပြင်ထွက်ပြီး မဲပေးကြရတဲ့အခါ လူစုလူဝေးဖြစ်ပြီး ရောဂါကူးစက်ခံရမလားဆိုတဲ့ စိုးရိမ်မှုတွေ လူတိုင်းမှာ ရှိနိုင်ပါတယ်။

ဒါပေမယ့် ကိုယ်ယုံကြည်တဲ့ အစိုးရတစ်ရပ်ကို မဲပေးရွေးချယ်နိုင်ခွင့်ဟာ ငါးနှစ်တကြိမ်သာ ရတဲ့ အခွင့်အရေးဖြစ်လို့ ရောဂါကူးစက်မှုကို စိုးရိမ်ပြီး မဲထွက်မပေးဘဲ မဲပေးခွင့်ကို အဆုံးရှုံးခံတာမျိုးတော့ ဖြစ်ချင်ကြမှာ မဟုတ်ပါဘူး။

ကိုဗစ်ကာလအတွင်းမှာ ရောဂါကူးစက်မှာ မရှိစေဘဲ လုံခြုံစိတ်ချစွာ မဲပေးနိုင်မှာလား? COVID-19 ရောဂါကို မိမိကစ စနစ်တကျကာကွယ်နိုင်မယ့် ကျန်းမာရေးဝန်ကြီးဌာနကချမှတ်ထားတဲ့ စံလမ်းညွှန်တချို့ကို ကောက်နှုတ် ဖော်ပြလိုက်ပါတယ်။

  • မိမိကိုယ်တိုင် COVID-19 ရောဂါလက္ခဏာ သံသယရှိနေပါက မဲရုံတာဝန်ရှိသူတွေကို ကြိုတင်အကြောင်း ကြားခြင်း။
  • မဲပေးဖို့လာရောက်တဲ့အခါ မဖြစ်မနေ နှာခေါင်းစည်း (Mask) ကို စနစ်တကျ တပ်ဆင်လာခြင်း။
  • မဲရုံအတွင်းမှာ တစ်ဦးနဲ့တစ်ဦး (၆)ပေအကွာကနေ စနစ်တကျ တန်းစီစောင့်ဆိုင်းခြင်း။
  • လက်ဆေးရန်နေရာမှာ လက်ကိုဆပ်ပြာ(သို့)လက်သန့်ဆေးရည်နဲ့ စက္ကန့် (၂၀) ကြာစနစ်တကျ ဆေး ကြောသန့်စင်ခြင်း။ မဲရုံအဝင်ဝမှာ အဖျားတိုင်းတာခြင်း။
  • မိမိရဲ့နိုင်ငံသားမှတ်ပုံတင်ကဒ်ပြားကို မဲရုံကပေးတဲ့ ပလပ်စတစ်အိတ်အကြည်နဲ့ စနစ်တကျထည့်ပြီး ပြသ ခြင်း။
  • လက်သန်းကိုမှင်တို့ရာမှာ လက်ကိုခွက်နဲ့မထိအောင် သတိထားပြီး မင်တို့ခြင်း။
  • မဲပေးနေစဉ်ကာလအတွင်းမှာ လက်သန့်ဆေးရည်နဲ့ဆေးကြောတာကို မဲရုံအဝင်မှာတစ်ကြိမ်၊ မဲရုံကပြန် ထွက်ချိန်မှာ တစ်ကြိမ်နဲ့ အနည်းဆုံးနှစ်ကြိမ်ဆေးခြင်းတွေကို လုပ်ဆောင်ရပါမယ်။

ဒါ့အပြင် ရွေးကောက်ပွဲနေ့ မဲရုံတွေမှာ မဲပေးတဲ့အခါ မဲရုံတွင်း၊ မဲရုံအပြင်မှာ လူစုလူဝေးတွေ မဖြစ်စေဖို့ အစီအစဉ်တွေ၊ မဲရုံတာဝန်ကျ ဝန်ထမ်းတွေနဲ့ ဆန္ဒမဲပေးသူတွေအတွက် ကျန်းမာရေးဆိုင်ရာ အကာအကွယ်ပစ္စည်းတွေ ထားရှိဖို့ အစီအစဉ်တွေ စတဲ့ ကိုဗစ်စံလုပ်ငန်း လမ်းညွှန်ချက်တွေကိုလည်း ကျန်းမာရေးဝန်ကြီးဌာနက အသေးစိတ်ထုတ်ပြန်ထားပါတယ်။ 

စံလုပ်ငန်းစဉ်‌အပြည့်အစုံကိုတော့ ဒီလင့်ခ် https://bit.ly/2JEsboP  ကနေ ဖတ်ရှုနိုင်ပါတယ်။

ရွေးကောက်ပွဲနဲ့ မဲပေးခြင်းဆိုင်ရာ အခြားသော ဗဟုသုတအစုံအလင်ကို VoteMM Website https://www.votemm.info/ မှလည်း ဝင်ရောက်လေ့လာနိုင်သလို VoteMM ChatBot https://m.me/votemm.info မှတဆင့်လည်း သိရှိလိုသည်များကို လေ့လာမေးမြန်းနိုင်မှာ ဖြစ်ပါတယ်။