သထုံမြို့ လေယာဉ်ကွင်းဟောင်းအတွင်းတွင် ယာယီပျံကျဈေး ပြောင်းရွှေ့ဖွင့်လှစ်

Tuesday, 10 November 2020 11:10

Covid-19 ကူးစက်ရောဂါကြောင့် မွန်ပြည်နယ်၊ သထုံမြို့ရှိ သုဝဏ္ဏစျေးနှင့် မြို့မစျေးတို့ကို ယာယီပိတ်ထားခဲ့ရာ နိုဝင်ဘာ (၉) ရက်နေ့မှ စတင်ကာ သထုံမြို့  လိပ်အင်းရပ်ကွက်ရှိ လေယာဉ်ကွင်းဟောင်း အတွင်းတွင် ယာယီပျံကျဈေးကို ပြောင်းရွှေ့ ဖွင့်လှစ်ခဲ့သည်။

ထိုပျံကျ‌စျေးတွင် သား၊ ငါးနှင့် ဟင်းသီးဟင်းရွက်စသည့် အခြေခံ စားသောက်ကုန်များကို  ရောင်းချခွင့် ပေးထားသည်။ဃခင်လများ၌  သထုံမြို့မစျေးအတွင်းတွင်  စျေးရောင်းချနေသူများအနက်  Covid-19 ကူးစက်ရောဂါ ဓာတ်ခွဲအတည်ပြု လူနာအချို့ကို တွေ့ရှိခဲ့ရသဖြင့် ရောဂါဆက်လက်ပြန့်ပွားမှု မရှိစေရန် ကျန်းမာရေးနှင့် အားကစားဝန်ကြီးဌာန၏ လမ်းညွှန်ချက်နှင့်အညီ ဆောင်ရွက်ခဲ့ခြင်း  ဖြစ်သည်။

၀န်ကြီးဌာန၏ လမ်းညွှန်ချက်အရ Social Distancing ကို စနစ်တကျ နေရာသတ်မှတ်ကာ စျေးသည်များကို ရောင်းချစေခြင်း ဖြစ်ကြောင်း သထုံမြို့နယ်  စည်ပင်သာယာရေးအဖွဲ့မှ ဈေးတာဝန်ခံ တစ်ယောက်၏ ပြောကြားချက်အရ သိရသည်။

အဆိုပါ ယာယီပျံကျဈေးတွင် ဆိုင်ခန်းတစ်ခန်းလျှင် အကျယ်အ၀န်းအားဖြင့်  အလျား (၁၀) ပေနှင့်  အနံ (၆) ပေရှိသည့် ဆိုင်ခန်းပေါင်း (၃၈၀) ခန့်ကို Social Distancing အရ (၆) ပေစီခွာကာ  လူသွားလမ်းများကို (၁၀) ပေစီခြား၍ နေရာသတ်မှတ်ပေးထားသည်။

ထို့အပြင် Covid-19 ရောဂါ ကူးစက်ပြန့်ပွားမှု ထိန်းချုပ်နိုင်သည့် အပေါ် မူတည်၍ ဆက်လက် ဆောင်ရွက်သွားမည် ဖြစ်ကြောင်း သထုံမြို့နယ် စည်ပင်သာယာရေးအဖွဲ့မှ သတင်းထုတ်ပြန်ထားသည်။

By-Aye Myat

Source:mdn.gov

မြန်မာနိုင်ငံအတွက် ဂျပန်မှ အတိုးနည်းချေးငွေ ကန်ဒေါ်လာ (၄၁၄) သန်း ထုတ်ချေးမည်

Tuesday, 10 November 2020 05:25

မြန်မာနိုင်ငံအတွင်းရှိ အသေးစားနှင့် အလတ်စား ကုမ္ပဏီများကို ငွေကြေးထောက်ပံ့ရန်နှင့် လမ်းများ ဖောက်လုပ်ရန် အတိုးနည်းချေးငွေ အမေရိကန်ဒေါ်လာ (၄၁၄) သန်း ထုတ်ချေးရန် ဂျပန်နှင့် မြန်မာအရာရှိများမှ  နိုဝင်ဘာ (၈) ရက်နေ့တွင် လက်မှတ်ရေးထိုးခြင်း ပြုလုပ်ခဲ့သည်။

အဆိုပါ ချေးငွေစီမံကိန်းနှစ်ခုဖြစ်သည့် “ အရှေ့-အနောက်စီးပွား‌ရေးစင်္ကြံ အမြန်လမ်းဖွံ့ဖြိုးတိုးတက်ရေးစီမံကိန်း (ပဲခူး-ကျိုက်ထိုလမ်းပိုင်း) နှင့် “ အသေးစားနှင့် အလတ်စားစီးပွား‌ရေးလုပ်ငန်းများ ဘဏ္ဍာရေးဆိုင်ရာ ဖွံ့ဖြိုးတိုးတက်ရေး   စီမံကိန်း (အပိုင်း-၃)” တို့သည် တစ်နှစ်လျှင် အတိုးနှုန်း (၀.၀၁)% ရာခိုင်နှုန်းခန့်သာ ရှိသည်။

(ပဲခူး-ကျိုက် ထိုလမ်းပိုင်း)စီမံကိန်းအတွက် ဂျပန်ယန်း (၂၇, ၇၇၉) သန်း (အမေရိကန် ဒေါ် လာ ၂၆၅ သန်းခန့်)လျာထားကြောင်း  နိုင်ငံခြားရေးဝန်ကြီးဌာနမှ  ပြောကြားချက်အရ သိရသည်။ယင်း အရှေ့-အနောက် စီးပွားရေးစင်္ကြံသည် ဗီယက်နမ်၊ ထိုင်း၊ လာအိုနှင့် မြန်မာနိုင်ငံတို့ကို ဖြတ်သန်းသွားလာသည့် လမ်းကြောင်း တစ်ခုဖြစ်ပြီး ထိုင်းနိုင်ငံနှင့်မြန်မာနိုင်ငံကို ကုန်း ကြောင်းဖြင့် ဆက်သွယ်ပေးသည့် အဓိက လမ်းမကြီး တစ်ခု ဖြစ်သည်။

ထိုစီမံကိန်း ပြီးစီးပါက မြန်မာနိုင်ငံနှင့် အဓိကကုန်သွယ်ဖက်နိုင်ငံဖြစ်သည့် ထိုင်းနိုင်ငံနှင့် ကုန်သွယ်မှုပမာဏ ဆက်လက် မြင့်တက်လာမည် ဖြစ်သည်။ ထို့အပြင် မြန်မာနိုင်ငံ၏ အဓိက လေ့ကျင့်ရေး သင်တန်းကျောင်း ဖြစ်သည့် ဗဟိုသင်တန်းကျောင်း (သုဝဏ္ဏ) ရှိ အ‌‌ဆောက်အအုံနှင့် ပစ္စည်းကိရိယာများကို ပြန်လည်ပြုပြင် သွားမည် ဖြစ်သည်။

ထိုသို့ တံတား ဆောက်လုပ်ခြင်းနှင့် သင်တန်းကျောင်း ပြန်လည်ပြုပြင်ခြင်းသည် ပြည်တွင်းနှင့် နိုင်ငံတကာ ထောက်ပံ့ပို့ဆောင်ရေး ကဏ္ဍဆိုင်ရာ စွမ်းဆောင်ရည်ကို ပိုမို ဖွံ့ဖြိုးတိုးတက်စေမည် ဖြစ်ပြီး မြန်မာနိုင်ငံ၏ ဖွံ့ဖြိုးတိုးတက်မှုအတွက် ပံ့ပိုးကူညီနိုင်မည်ဖြစ်သည်။

အသေးစားနှင့် အလတ်စားစီးပွား‌ရေးလုပ်ငန်းများ ဘဏ္ဍာရေးဆိုင်ရာဖွံ့ဖြိုးတိုးတက်ရေး စီမံကိန်း (အပိုင်း-၃)အတွက်  ဂျပန်ယန်း (၁၅, ၀၀၀ )သန်း (အမေရိ ကန် ဒေါ် လာ ၁၄၄ သန်းခန့်)ကုန်ကျမည် ဖြစ်သည်။လက်ရှိတွင် အသက်ရှူလမ်း‌ကြောင်း ဆိုင်ရာရောဂါ (New Coronavirus Disease 2019, COVID-19) ကူးစက်ပျံ့နှံ့မှုကြောင့်  ငွေအရင်းအနှီး မရှိသော အသေးစားနှင့် အလတ်စားစီးပွားရေးလုပ်ငန်းများ များစွာ ထိခိုက်မှု ရှိခဲ့ရသည်။

ထိုစီမံကိန်းအရ အသေးစားနှင့် အလတ်စားစီးပွား‌ရေး လုပ်ငန်းများသို့ အပေါင်ပစ္စည်းဆိုင်ရာ စည်းမျဥ်းများကို ဖြေလျှော့ထားသော ကာလလတ်နှင့်  ကာလရှည်ချေးငွေများဖြင့် အရင်းအနှီးများကို ပံ့ပိုးပေးသွားမည်ဖြစ်ပြီး ဘဏ္ဍာရေး အဖွဲ့အစည်းများ၏ စွမ်းရည်မြှင့်တင်ရန် အတွက်လည်း ပံ့ပိုးကူညီသွားမည် ဖြစ်သည်။ ထို့အပြင် အဆိုပါလုပ်ငန်းများ၏ ထုတ်လုပ်ရေးနှင့် ရင်းနှီးမြှုပ်နှံမှုကို တိုးချဲ့နိုင်မည် ဖြစ်သည်။

By-Aye Myat

Source:emb.japan,dvb

ကိုဗစ်ကာလအတွင်း ရွှေပိတောက်ငါးဈေးကြီး၌ ရေထွက်ကုန်ပစ္စည်းများ အရောင်းအဝယ်ကောင်း

Monday, 09 November 2020 05:51

ကိုဗစ်ဖြစ်ပွားစဥ် ကာလအတွင်းတွင်  ရန်ကုန်မြို့ရှိ စီးပွားရေးလုပ်ငန်းများသည်  အခက်အခဲများ ရှိသော်လည်း ပြည်တွင်းစားသုံးမှုကို အထောက်အပံ့ ဖြစ်စေသည့်  ရေချို၊ ရေငန် ရေထွက်ပစ္စည်းများသည် နေ့စဉ်နှင့်အမျှ  ငါးစျေးများသို့ ဝင်ရောက်လျှက် ရှိရာ ရန်ကုန်မြို့ရှိ ရွှေပိတောက်ငါးဈေးကြီးတွင် အရောင်းအဝယ်များ  အဆင်ပြေလျက်ရှိသည်။

လက်ရှိအချိန်တွင် ရွှေပိတောက် ငါးဈေးကြီး၌ ငါးမြစ်ချင်း တစ်ပိဿာလျှင် ကျပ် (၂၅၀၀)၊ ငါးကြင်း တစ်ပိဿာလျှင် (၅၅၀၀)ကျပ် ၊ ငါးတန် တစ်ပိဿာလျှင် (၂၂၀၀)ကျပ် ၊ ငါးမုန့် တစ်ပိဿာလျှင် (၂၀၀၀)ကျပ် ၊ တီလားဗီးယား တစ်ပိဿာလျှင် (၂၈၀၀)ကျပ် ၊ ရေဘဝဲ တစ်ပိဿာလျှင် (၁၂၀၀၀) ကျပ်၊ ပလာတူး တစ်ပိဿာလျှင် (၂၀၀၀)ကျပ်၊ ပြည်ကြီးငါး တစ်ပိဿာလျှင် (၁၃၀၀၀)ကျပ် ၊ ကင်းမွန် တစ်ပိဿာလျှင် (၉၀၀၀)ကျပ်၊ ရွှေငါး တစ်ပိဿာလျှင် (၁၆၅၀)ကျပ် နှင့် ငါးသလောက် တစ်ပိဿာလျှင် (၂၅၀၀၀)ကျပ် စသဖြင့် စျေးအသီးသီး ရှိသည်။ 

ယခင်လများ၌ (၂၀၀)ကျပ် ၀န်းကျင်ခန့်သာ ဈေးအတက်၊ အကျရှိသော်လည်း ယခု နိုဝင်ဘာလမှ စတင်ကာ စားသုံးသူများအတွက် ကုန်ပစ္စည်း ပြတ်လပ်မှုနှင့် ဈေးနှုန်းကြီးမြင့်မှု မရှိတော့ပေ။

တရုတ်ပြည်သို့ မြန်မာမှ ရေထွက်ပစ္စည်း တင်ပို့မှုအား နိုဝင်ဘာလမှစ၍ ပိတ်ထားခဲ့ရာ ရေချိုလုပ်ငန်းရှင်များနှင့် ပင်လယ်ငါးဖမ်း လုပ်ငန်းရှင်များမှ  ပြည်တွင်းဈေးကွက်သို့ ဖြန်ဖြူးရာတွင်  ကိုဗစ်ကာလ အတွင်း၌ စျေးကွက်အတွင်းတွင်  အဆင်ပြေလျက် ရှိပေသည်။

သီရိမင်္ဂလာ ကုန်စိမ်းဈေးနှင့် ကပ်လျက်ရှိသော ရွှေပိတောက်ငါးဈေးသည် အကျယ်အ၀န်းအားဖြင့်  ရှစ်ဧကခန့်ရှိသည်။အဆိုပါ စျေးတွင် ဈေးရုံပေါင်း ရှစ်ရုံခန့် ရှိသည့်အပြင်  (၁၁) ပေနှင့် (၁၈) ပေ ကျယ်သည့် ဆိုင်ခန်းပေါင်း (၄၀၀) ကျော်ရှိသည်။ 

ငါးစားသုံးမှု များလာသည့် ရန်ကုန်မြို့ရှိ ရွှေပိတောက်ငါးဈေးတွင် တစ်ရက်လျှင် ရေထွက်ပစ္စည်း တန်ချိန်ပေါင်း တစ်သိန်းခွဲခန့် ပုံမှန်ဝင်ရောက်လျက်ရှိပြီး ယခုရက်ပိုင်းအတွင်းတွင် တစ်ရက်လျှင် တန်ချိန်နှစ်သိန်းခန့် တိုးမြှင့် ဝင်ရောက်လျက် ရှိသည်။ 

By-Aye Myat

Source:mdn

ကြက်သားစားသုံးမှု နည်းပါးလာသည့်အတွက် ကြက်သားဈေးနှုန်း ဆက်တိုက်ကျဆင်း

Sunday, 08 November 2020 06:14

မြန်မာနိုင်ငံတွင် ကြက်မွေးမြူသူ အများစုသည် တစ်နှစ်ကို ကြက်ထုတ်လုပ်မှု (၁၅) ရာခိုင်နှုန်းခန့် တိုးတက်စေရန် အသားတိုးကြက်ထုတ်လုပ်မှုများအား ပိုမိုမြင့်တက်အောင် လုပ်ဆောင်နေချိန်တွင်  ကြက်သား စားသုံးမှုများ ကျဆင်းလာသည့်အတွက်  ကြက်သားဈေးနှုန်းသည် ကိုဗစ် ဖြစ်ပွားချိန်မှ စတင် ကျဆင်းလာကာ ယခုအချိန်အထိ ထုတ်လုပ်မှုစရိတ်အောက်သို့   ရောက်ရှိနေဆဲဖြစ်သည်။

လက်ရှိမန္တလေးမြို့တွင် အသားတိုးကြက်ခြံတွင်  ခြံဖမ်းဈေးနှုန်းအနေနှင့် တစ်ပိသာလျှင် ကျပ်(၂၇၀၀) ခန့်ရှိပြီး ကြက်မွေးမြူသူများ၏ ထုတ်လုပ်မှုစရိတ်သည် တစ်ပိသာလျှင် ကျပ်(၂၆၀၀)နှင့် (၂၈၀၀) ကြားတွင် ရှိနေသည့်အတွက် ကြက်သားဈေးနှုန်းသည်  ထုတ်လုပ်မှု ကုန်ကျစရိတ်အောက် ကျဆင်းနေပြီး ကြက်မွေးမြူသူများ အနေဖြင့်  တွက်ချေမကိုက် ဖြစ်နေလျက်ရှိသည်။

“ကိုဗစ် စဖြစ်ထဲက ကြက်သားဈေးက ကျနေတယ်။လက်ရှိအနေအထားကတော့ ထုတ်လုပ်မှုစရိတ်ရတဲ့ အနေအထားရှိတယ်။ကြက်သားဈေးက အမွှေးအူနုတ် တစ်ပိသာ ကျပ်(၄၅၀၀)နဲ့ (၄၅၀၀)ကြားမှာရှိပါတယ်။စားသောက်ဆိုင်တို့ ဟိုတယ်တို့ အဲဒီလုပ်ငန်းတွေ မဖွင့်နိုင်သေးတော့ စားသုံးမှုကတော့ အတိုင်းအတာ တစ်ခုအနေနဲ့ လျော့သွားတယ်” ဟု မြန်မာနိုင်ငံမွေးမြူရေးလုပ်ငန်းအဖွဲ့ချုပ်မှ တာ၀န်ရှိသူ တစ်ဦးမှ ပြောကြားသည်။

စားသောက်ကုန်တစ်ခု အပါအဝင်ဖြစ်သော ကြက်ဥမှာ ပုံမှန်စားသုံးမှု အနေအထားရှိသည့်အတွက်  ထုတ်လုပ်မှု ဈေးနှုန်းအောက်သို့ ရောက်ရှိသွားခြင်း မရှိပဲ ပုံမှန်အနေအထားအတိုင်း ရှိသည်။

“မြို့ပေါ်မှာ ကြက်သားရောင်းတဲ့သူ ကြက်ဥရောင်းတဲ့သူအနေနဲ့ကတော့သူ့ရဲ့ ရောင်းအား မြင့်နေမှာ၊ တစ်နိုင်ငံလုံး အနေနဲ့ခြုံရင်တော့မရဘူး၊ ကြက်ဥရောင်းအားကတော့မြင့်တယ်။ အခြေခံ စားသောက်ကုန်ထဲမှာပါနေတယ့်အတွက်  ကြက်ဥဈေးက ပုံမှန် တက်လိုက် ကျလိုက်ပါပဲ။ စားသုံးသူရော ထုတ်လုပ်သူရော အဆင်ပြေတဲ့ ဈေးနှုန်းမှာပဲရှိနေတာ၊ ကြက်သားထုတ်လုပ်မှုများနေပြီး စားသုံးသူနည်းနေတဲ့ အခြေအနေ ဆက်ဖြစ်နေမယ်ဆိုရင် အငယ်စားနဲ့ အလတ်စားမွေးမြူသူတွေအနေနဲ့ကတော့ ရေရှည်မှာမွေးမြူနိုင်ဖို့ မလွယ်တော့ဘူး၊ အဓိက ထုတ်လုပ်မှုကို အတိုင်းအတာတစ်ခုအထိ လျော့ချမှရမှာ'' ဟု ဆက်လက် ပြောကြားချက်အရ သိရသည်။

မန္တလေးတိုင်းဒေသကြီးတွင် အသားတိုးမွေးမြူသူများအနေဖြင့် မန္တလေးပတ်ဝန်းကျင်တွင် အများစုရှိပြီး  ဥစားကြက်မွေးမြူသူများအနေဖြင့် ပြင်ဦးလွင်တွင် အများဆုံး ရှိကြသည်။တစ်နိုင်ငံလုံးအနေအထားအရ ကြက်ဥ စားသုံးမှုသည် လူတစ်ဦးလျှင် တစ်နှစ်၌ အလုံး (၆ဝ) ခန့်ရှိပြီး ကြက်သားစားသုံးမှုအ‌ေနဖြင့် တစ်နှစ်ကို ငါးပိသာခန့်ရှိသည်။

By-Aye Myat

Source:moi

ကျပ် (၃၀၅)သန်း အကုန်ကျခံကာ မကွေးမြို့နယ်ရှိ ကျေးရွာ(၁၉) ရွာအား သောက်သုံးရေ ရရှိရန် လုပ်ဆောင်မည်

Saturday, 07 November 2020 05:35

မကွေးတိုင်းဒေသကြီး မကွေးမြို့နယ်အတွင်းရှိ ကျေးလက်နေပြည်သူများ သောက်သုံးရေ လုံလောက်စွာ ရရှိစေရေးအတွက် ယခုဘဏ္ဍာနှစ်တွင် ငွေလုံးငွေရင်း ခွင့်ပြုရန်ပုံငွေကျပ်(၃၀၅.၇၁) သန်း အသုံးပြုကာ ကျေးရွာ(၁၉)ရွာတွင် သောက်သုံးရေ လုံလောက်စွာ ရရှိရေး လုပ်ငန်းများကို ဆောင်ရွက်ပေးသွားမည် ဖြစ်ကြောင်း  မကွေးမြို့နယ် ကျေးလက်ဒေသ ဖွံ့ ဖြိုးတိုးတက်ရေး ဦးစီးဌာနမှ သတင်းထုတ်ပြန်ထားသည်။

ထိုသို့ ကျေးရွာများတွင် သောက်သုံးရေ လုံလောက်စွာ ရရှိစေရေးအတွက် ယခု ဘဏ္ဍာနှစ်အတွင်းတွင် ကျေးလက်ဒေသ ဖွံ့ဖြိုးတိုးတက်ရေး ဦးစီးဌာနမှ ခွင့်ပြုရန်ပုံငွေကျပ်(၁၁၉.၁)သန်း၊မကွေးတိုင်း ဒေသကြီးအစိုးရအဖွဲ့မှ  ရန်ပုံငွေကျပ်(၁၀၆.၆)သန်း စုစုပေါင်း ငွေကျပ်(၃၀၅.၇၁) သန်းကို အသုံးပြုကာ ဆောင်ရွက်သွားမည် ဖြစ်သည်။

အဆိုပါ ရန်ပုံငွေကို အသုံးပြုကာ စက်ရေတွင်းများ တူးဖော်ခြင်း၊မြေသားရေကန်များ တိုးချဲ့တူးဖော်ခြင်း၊ရေမြှပ်ပန့် တပ်ဆင်ခြင်း လုပ်ငန်းများ ဆောင်ရွက်ခြင်း၊ဂါလန် (၂၄၀၀)ဆံ့ အမြင့်တင် ရေစင် တည်ဆောက်ခြင်း လုပ်ငန်းများ၊ ဂါလန်(၅၀၀၀)ဆံ့ အုတ်ရေကန် တည်ဆောက်ခြင်းလုပ်ငန်းများနှင့် ရေစက်ရုံ တည်ဆောက်ခြင်း လုပ်ငန်းများကို လုပ်ဆောင်သွားမည် ဖြစ်သည်။

လက်ရှိအချိန်တွင် ယင်းလုပ်ငန်းများ လုပ်ဆောင်နိုင်ရန်အတွက် တင်ဒါခေါ်ယူခြင်းလုပ်ငန်းများအား စတင်ဆောင်ရွက်နေပြီ ဖြစ်ကြောင်း မကွေးမြို့နယ် ကျေးလက်ဒေသ ဖွံ့ဖြိုးတိုးတက်ရေး ဦးစီးဌာနမှ တာ၀န်ရှိသူ တစ်ဦးမှ ပြောကြားသည်။

မကွေးမြို့နယ်အတွင်းတွင် (၂၀၁၉−၂၀) ဘဏ္ဍာနှစ်တွင်လည်း သောက်သုံးရေ ရှားပါးသော ကျေးရွာ(၁၂)ရွာကို တွင်းနက်စက်ရေတွင်းများ တူးဖော်ခြင်းနှင့် အခြားသော ရေရရှိရေးလုပ်ငန်းများကို ကျေးလက်ဒေသ ဖွံ့ဖြိုးတိုးတက်ရေး ဦးစီးဌာနမှ ခွင့်ပြုရန်ပုံငွေကျပ် (၁၉၉.၂၄၁)သန်းဖြင့် ဆောင်ရွက်မှုများ ပြုလုပ်ခဲ့သည်။

By-Aye Myat

Source:moi